Tsy takona afenina ny zava-misy ao amin’ny kaominina Mampikony fa indrindra amin’izao fifidianana Ben’ny tanàna sy mpanolotsaina ny tanàna izao.

   Tsikaritra fa mirona manohana kandida tsy miankina (N°05) ireo mpanohana sy mpiaramiasa (STAFF – Assistant Parlementaire) an’ny Depiote amperinasa ao Mampikony. Depiote izay lany tamin’ny antoko IRMAR na volomboasary manohana fitondrana mijoro ankehitriny.

   Tsy tafiditra ho kandidam-panjakana‚ nahilika fa tsy mahafa-po ary tsy mahatohitra an’i GERARDIN ny olona natosiky Depiote io ka naleon’antoko nitady olon-kafa‚ azo antoka fa hibata fandresena ary afaka hitondra fampandrosoana hoan’ny kaominina Ambonivohitra Mampikony no tohanana‚ hoy ny fanehoan-kevitr’ireo olom-pirenena manaraka toe-draharaha ao an-toerana.

   Kandida avy tao amin’ny Fikambanana Gomabe Sofia‚ Mpampianatra – Mpanabe manana ny maha izy azy sy ny tanjany moa i GERARDIN kandida N°04‚ izao noraisin‘ny vondrona politika IRMAR ho kandida amin’ny fifidianana Ben’ny Tanàna izao.

   Midika ve izany fa tsy to-teny eo anivon’ny antoko IRMAR intsony ny Depiote voafidy tao Mampikony izay tsy nahatafiditra ny kandida tohanany ao anaty vondrona parlemantera misy azy ao amin’ny kaominina Ambonivohitra Mampikony sa inona no mety ho antony ? Hiraviravy tànana sa hanohana kandida natolotry IRMAR ingahy Solombavambahoaka ? sa hanohy ny fanohanany ilay kandida noeritreretiny izay voatery nirotsaka amin’ny anarany tenany manokana (indépendant) ? Fanontaniana apetraky ny mpanara-baovao fa arahintsika eto ny mety ho tohiny‚ fa ny fanehoan-kevitr’ireo mpiaramiasa akaiky Depiote tatoato dia efa afaka hitarafana fa tsy manohana io kandida IRMAR amin’ny fifidianana Ben’ny tanàna io izy sy ny ekipany.

   Marihina fa tafiditra avokoa ny ankamaroany kandida natolotry Depiote amperinasa io‚ hoan’ny kaominina any Ambanivohitra anaty Distrika Mampikony raha ny angom-baovao voaray…