Nidina tao amin’ny kaominina Marotsipoy Anjozorobe ireo lehiben’ny Tafika mitambatra mivondrona ao amin’ny “EMMONAT”, nanome toromarika ireo mpitandro filaminana eny an-kianja‚ mba hitadiavam-bahaolana manoloana ny tranga mahatsiravina niseho tany an-toerana.

   Raha tsiahivina ny tantara dia nalaina an-keriny ny 04 Aogositra 2024 teo izy dimy lahy. Natao takalon’aina‚ nitaky 200 000 000 Ar ireo jiolahy ho tambin’ny famotsorana azy 05 lahy, saingy raha ny fanazavana dia tsy nanana io vola io ny fianakaviana.

   Herinandro maromaro izy 05 lahy teo ampelatanan’ny dahalo mpaka an-keriny‚ ny 29 Aogositra 2024 teo‚ niantso ny fianakaviana izay tsy nahita io vola notakina io ireo dahalo mba haka ny vata-mangatsikan’ireo 05 lahy‚ izay voalaza fa nofatorana am-bodihazo izy ireo ary notifirina mba ho faty avy eo.

   Tranga mahavaky fo‚ mampivarahontsana ity niseho ity‚ mpampianatra FRAM ary misy Tanora vao 17taona monja‚ afaka bakalorea tamin’ity taona ity ireo maty natao takalon’aina ireo.

   Mihorohoro araka izany ny vahoaka amin’ny faritra 03 mpifanila bodirindrina (Analamanga-Betsiboka-Alaotra Mangoro). Tranga tahaka izao no ilana ny traikefa sy fahaiza-manaon’ireo mpitandro filaminana fa arahintsika eto ny mety ho tohiny.