Nomarihina nandritra ny 02 andro teto Antsohihy renivohitry ny faritra Sofia ny faha-05 taona ny EDSP (Ecole de Droit et Science Politique) Antenne Antsohihy. Andiany miisa 02‚ maherin’ny 20 no efa navoakany.

    Miavaka ny fiarahamonina‚ ny firenena misy olona mahay lalàna sy manara-dalàna ary manomboka amin’izay ny fandrosoana sy ny filaminany. Ilaina ny mianatra lalàna‚ hoy Dr HDR Loulla Chaminah‚ mpampianatra ao amin’ny EDSP.

    Niatrika ny fotoana ny manampahefana ambony ato amin’ny faritra Sofia izay notarihin’ny Sekretera Jeneralin’ny Faritra‚ tazana nanontrona teto ihany koa ny filohan’ny Oniversite Mahajanga miaraka amin’ireo mpampianatra maro eo anivon’ny Oniversite eto Madagasikara. Atrik’asa famelabelaran-kevitra momba ny maha zava-dehibe ny fahaizanao sy fanajana lalàna ao anaty fiarahamonina sy ny firenena‚ diabe namakivavy tanàna Antsohihy ary nofon-kena mitam-pihavanana no nandravahana ny lanonana nandritra ny 02 andro.

    Mandray mpianatra vao afaka bakalorea ny EDSP Antsohihy ary tsy mitsahatra mitombo isan-taona ny mpianatra misafidy ny hanohy fianarany eto‚ misy ireo avy amin’ny Distrika sy faritra manodidina ny faritra Sofia mianatra ato noho ny fisiany mpampianatra matihanina ao aminy.