Lanonana ara-pitsarana manetriketrika no nametrahana an’i Dr Andrimpirenena André ho Tonia mpampanoa lalàna ao amin’ny fitsarana ambaratonga voalohany Mandritsara omaly zoma 05 Jolay 2024.

   Ny Fampanoavana izay tarihiko dia mametraka fanamby ny hanamafy orina ny tany tan-dalàna sy hamerina amin’ny tokony ho izy ny fahefam-panjakana. Iarahantsika mahalala fa manerana an’ny Madagasikara, anisan’izany ny faritra Sofia dia somary marisarisa ny tany tan-dalàna satria misy ny sokajin’olona izay mihevitra fa ambonin’ny lalàna sy tsy azo kitihina noho ny toerana misy azy. Marisarisa ihany koa ny fahefam-panjakana satria misy olona na andian’olona izay miezaka te-hisalovana an’izany fahefàna izany kanefa tsy ao anaty lasitra izay voalazan’ny lalàna tokony hanana azy. Voasalovana matetika amin’izany ny asam-pitsaràna sy ny asan’ny Mpitandro filaminana. Mateti-pitranga ny andian’olona na fikambanana minia mandika ny fahefana omen’ny lalàna azy ka mitsabaka amin’ny fahefana hafa ka mitera-doza ho an’ny zon’olombelona. Misy aza andian’olon-dratsy mitarika fokonolona hanao fitsaram-bahoaka amin’ny olona izay efa voatazona amin’ny Mpitandro filaminana. Ny Fampanoavana izay eo ambany fahefako dia hanao ny ezaka rehetra hialàna amin’izany toe-javatra izany ary hanenjika an’ireny olona ireny amin’ny fomba sy paik‘ady ary fotoana maha-mety azy araka ny lalàna‚ hoy Dr Andrimpirenena André – Tonia mpampanoa lalàna ao fitsarana ambaratonga voalohany raha nandray fitenenana voalohany taoriany fametrahana azy amin’ny toerany.

   Tsy ny famenoana ny fonja na ny fanomezana fahafaham-po ny manan-draharaha (mpitory na voampanga na ny mpitazana) no zava-dehibe sy itarafana fa miasa sy mahomby ny fampanoavana fa ny fampiharana ny lalàna amin’ny fanajana ny zon’ny tsirairay. Hiezaka hampanaja an’izany zon’olombelona izany ihany koa ny tenanay amin’ny sehatra rehetra azo anatanterahana izany, ary tsy hisalasala handray ny fepetra rehetra voalazan’ny lalàna raha misy fanosihosena azy, anisan’izany ireo endrika kolikoly isan-karazany. Farany, hijoro handray anjara amin’ny fampandrosoana ny Fampanoavana amin’ny alalan’ny fandrindrana ny fiaraha-monina sy ny fiezahana hametraka fandriam-pahalemana maharitra mba ho fiarovana ireo sehatr’asa fihariana maro isan-karazany. Hapetraka ny politikam-panenjehana mifanaraka amin’izany ka ho hentitra araka ny fanenjehana ireo olon-dratsy rehetra na iza na iza izay manimba ny fihariana ato amin’ny faritra‚ hoy izy namarana ny laha-teniny.

   Mpahay lalàna – Dr spécialiste “Protection pénale des espèces en voie de disparition” izy‚ mitana laharana voalohany ary “major de promotion” hatrany izy raha ny zavatra tsikaritra nandritra ny famakiana ny “Curriculum vitæ” na ny mombamomba azy izay voarakitra an-taratasy.

   Nanontrona sy nanome voninahitra ity lanonam-pitsarana ity ny Mpanolotsaina ao amin’ny Filan-kevitra ambony miandraikitra ny Mpitsara‚ ny Filoha voalohany mpisolo toerana ao amin’ny Fitsarana Ambony Mahajanga‚ ny Tonia Mpampanoa Ambony ao amin’ny Fitsarana ambony Mahajanga‚ ny Filohan’ny rantsana ao amin’ny Fitsarana ambony Mahajanga‚ ireo Lehiben’ny Fitsarana sy Tonia mpampanoa lalàna‚ Mpitsara maro avy ato anaty sy ivelan’ny faritra Sofia; Ny Solombavambahoakan’ny Madagasikara voafidy teto Mandritsara sy Befandrina Avaratra‚ ny Governoran’ny faritra Sofia‚ Lehiben’ny Distrika‚ ary ireo manamboninahitra‚ manampahefana maro…