Niteraka resa-be ireo hazo voatetitetika miisa 300 izay hita tao Bemarambonga kaominina Antsahabe Distrika Antsohihy. Ny sasany nilaza fa an’ny manampahefana ambony ao amin’ny fitaleavam-paritry ny tontolo iainana sy fandrosoana lovain-jafy ireo hazo ireto ary kasaina hoampakarina aty Antsohihy ka izao tratehaky ny Zandary izao.

   Ny fanadihadiana natao no nahafantarana izay tompony‚ ary io tompony io no nilaza fa nahazo alalana amin’ny manampahefana isan’ambaratongany izy mialoha ny fanapahana ireto hazo ireto‚ raha ny fanazavana.

   Efa hatramin’ny volana Jolay 2024 no nikarakara antotan-taratasy‚ nanao fangatahana mba ahafahana manapaka hazo i Zaramina monina ao Bemarambonga‚ izay voalaza fa hanaovany trano.

   Nandiso ny filazam-baovao izay miendrika fanalam-baraka natao azy ny fitaleavam-paritry ny tontolo iainana sy fandrosoana lovain-jafy ary nanamafy fa manan-jo hisitraka ny vokatry anaty ala (droit d’usage) na zo-nentimpaharazana (Ohatra : ny filana amin’ny taotrano) izany anefa dia tsy maintsy anaovana fangatahana‚ mihainga avy any ifotony (fokontany) ary miafara amin’ny Benin’ala. Nandritra ny fitsirihana natao ifotony no nahafantarana fa voahaja avokoa ny fepetra maha ara-dalana ny fisitrahana ny zo-nentimpaharazana hanaovana trano izay misoratra amin-dRamatoa Zaramina‚ araka ny fanazavana voaray.