Manoloana ireo fitarainana maro‚ momba ny hopitalim-bahoaka tonga eo am-pelatanan’ny Solombavambahoaka voafidy teto Antsohihy dia nidina ifotony izy sy ireo mpanolotsainy ary ny Ben’ny tanàna NASIRY Ali‚ nifampiresaka sy nanadihady ny zava-misy sy antony fitarainana maro azony‚ toy tsy fahataran’ny fahatongavan’ireo mpitsabo rehefa misy olona mila fitsaboana maika‚ fidangan’ny vidim-panafody‚ fandoavan’olona marary vola hividianana solika rehefa delestazy‚ ary antony mahabetsaka olona maty rehefa hoentina tsaboina ao amin’ny hopitaly be Antsohihy…

   Nilaza ny solombavambahoaka fa tokony apetraka amin’ny takelaka ny sandam-bola fitsaboana sy ny lalàna na didim-panjakana milaza momba izany mba hisian’ny mangarahara‚ nofantariny ihany koa ny antony mahatara ireo mpitsabo amin’ny fandrasaina marary sy ny vahaolana mifandray amin’izany mba hampihena ny tahan’isan’olona maty rehefa mandeha mitsabo tena ao amin’ny hopitalim-bahoaka.

   Hentitra ny Solombavambahoaka Hyacinthe Befeno Todimanana manoloana ny fahasalam-bahoaka ary hanaramaso sy hiaraka hitondra vahaolana amin’ireo tompon’andraikitra isan’ambaratonga izy ho fitsinjovana ny vahoaka. Fifampiresahana sy fitadiavam-bahaolana maharitra no natao teto ary antenaina hiroso amin’ny fanatsarana hatrany ny fandrasaina sy fitsaboana marary amin’ny hopitalim-bahoaka mba hisiany fahatokisana ary hamporisika ny olona marary mba hanatona ny toby fahasalamana ahafahana mitsabo azy ara-potoana.