Dahalo mirongo basy miisa 70 no nifampitifitra tamin’ireo miaramila manao fisafona ho fampandriana fahalemana tao amin’ny Distrika Antanimora atsimo ny 20 Septambra 2024 teo. Nafana ny fifanjevoana ka voatifitra ny miaramila 03 lahy ary azon’ireo dahalo ny basy teny aminy fa chargeur sy bala ihany nohentin’ireo tsy mataho-tody.

   Natao veloma farany sy fomba ara-miaramila mialoha ny hitondrana azy amin’ny fasan-drazany ireto miaramila 03 : Sergent-chef DORSEL Rolland – Soldat de 2ème classe RAVELOMAHAZO – Soldat de 2ème classe NANTENAINA Stéphano Jean Zoré.

   Nanatrika izao fanaovam-beloma farany azy telo lahy izao ny Jeneraly ANDRIANANTENAINA Félicien Arthur izay Talen’ny Ivontoeram-panetsehana ireo Miaramila (COIA) izay misolo tena ny Jeneraly Lehiben’ny Etamazoron’ireo Tafika notronin’ireo tompon’andraikitra ambony eo an’ivon’ny Etamazaoron’ny tafika an-tanety avy Antananarivo sy ny tany an-toerana. Tsy ho avela ho raraka an-tany ny rà latsaka namoizana aina toy izao‚ mitohy ny hetsika fidinana an-kianja‚ hoy izy ireo nankahery ny fianakaviana.