Tratra ariva avy nivarotra ilay Ramatoa nitondra vola be 04 tapitrisa Ariary (20 000 000fmg) ka nandeha Taxi-ville teto Antsohihy renivohitry ny faritra Sofia omaly 23 Jolay 2024. Noho ny hamehana anefa dia adino tao anaty fiara niarahany io ilay poketra nisy vola be.

   Notehirizin’ny mpamily izany nandritra ny alina ary noresahiny tamin’ny filohan’ny sendika Taxi-ville Antsohihy ny maraina teo mba averina amin’ny tompony.

   Tonga nanatona ny filohan’ny sendika ilay Ramatoa nanadino poketra feno vola tao anaty fiara ity ny maraina ny 24 Jolay 2024 ka nomena ny tompony ity vola be mitentina 04 tapitrisa Ariary‚ tsy nisy banga ity.

   Manamafy hatrany ny filohan’ny sendika fa ny fitaizana ataon’ny Ben’ny tanàna NASIRY Ali sy ny Talem-paritry ny filaminam-bahoaka izay mizara traikefa sy fahaiza-miaina matetika amin’ireo mpamily no nampiova toe-tsain’ny mpamily Taxi-ville Antsohihy‚ mitohy ny fiarahamiasa amin’ny vahoaka ary hiezaka hatrany izy ireo amin’ny fanatsarana ny fiarahamiasa.