Dahalo raindahiny amin’ny halatr’omby sady mpamerin-keloka‚ mpampihorohoro vahoaka amin’iny efi-tany Andilamena‚ Amparafaravola ary Distrikan’i Mandritsara iny i Randriamalala Philibert dit GADOKO. Fotoana fiakarany vokatra sy fety tahaka izao no manararaotra manao asa ratsiny ireo dahalo. Nahazo vaovao avy amin’ny olona tsara sitra-po ny zandary izay manao fisafoana manodidina iny toerana iny‚ ny alin’ny 19 hifoha 20 Jona 2024 ka nidina ifotony amin’ny toerana misy fanafihana avy hatrany.

   Mbola teo ampanaovana asa ratsy izy ireo no tonga tampoka ny Zandary tarihin’ny Kapiteny TOBIASY‚ komandy ny vondron-tobim-paritra Andilamena ka raikitra ny fifanjevona. Nanano sarotra ny fisamborana, voatery nampiasa fitaovana teny ampelatanany ny zandary. Olona iray no lavo voatifitra ary voamarina fa i Gadoko izany nandritra ny fitsirihana natao azy‚ tafaporitsaka ireo namany‚ araka ny fanazavana.

   Mitohy ny fikarohana ireo namany‚ manamafy ny fitandroana ny filaminana mialoha sy mandritra ary aorian’ny fetim-pirenena ny Zandarimaria. Tsy andeferana ireo mpamerin-keloka sy mpanao asa ratsy fa tsy maintsy faizina mba ahafahan’ny vahoaka miaina am-pilaminana amin’ny vokatra azony sy manao ny velontenany.