Raha ny fanazavana nataon’Atoa Christophe ‚ mpampianatra izay voarohirohy tamin’ity tranga ity :

– Tsy nanimba sekoly izahay fa ampitaka nanamborana anay ‚ tany an-tanimbolin’ny tsaramaso izahay tamin’ny 03 Ora tolakandro ny androny sabotsy nahasimba sekoly io ‚ nandeha nanarato taorian’izay ‚ efa tamin’ny 05 Ora ariva nody ary nijanona tao an-trano ihany niaraka tamin’ny vady aman-janako tamin’iny fotoana iny . Ny andro nisamborana anay ‚ Tamin’ny 07 Ora alina no tonga nandondona tao an-tranoko ny Chef ZAP ‚ nilaza fa hivory momba ny raharaha fahasimbany sekoly sy fitadiavam-bahaolana momba izany saingy zavatra hafa no nitranga . Nofatoran’ireo zandary rojo vy ny tananay rehefa tonga tany amin’ny tranony Chef ZAP ary nosaritin’ireo sahala amin’ny fatin’alika aveo hatrany Bealanana ‚ ny andro alina tsy nisy fiomanana ‚ hatsiaka manao ny ataony amin’ny andro ririna.

– Nobetrohan’ireo zandary ary notereny ho tsy maintsy nanimba ny sekoly manarapenitra izahay saingy tsy nanaiky hatramin’ny farany ‚ nanampy trotraka ihany koa ny fanasana ati-doha nataony Chef CISCO izay nanery sy nampihorohoro anay tahaka izany koa.

– Malahelo izahay tamin’ny fisamborana anay sahala amin’ny mitondra biby . Nalaim-baraka erany tambazotran-tserasera ‚ Nosazina sy nomelohina 10 taona an-tranomaizina sazy mihatra tamin’ny didy navoakany fitsarana ambaratonga voalohany Antsohihy tamin’ny zavatra tsy nataonay koa miangavy ny fitondram-panjakana mahefa mba hanao fanadihadiana ifotony ary handray fepetra hentitra amin’ireo tompon’andraikitra nanao habibiana taminay ireo ary indrindra amin’izay nanimba io sekoly fa mafy ny fanalam-baraka sy herisetra nozakainay tamin’iny raharaha iny nefa mba mpampianatra ‚ mpanabe ihany ny tena.

– Mankasitraka ireo vahoaka ao Ambodiampana ‚ ireo mpampianatra namana manerana ny nosy izay nanohana ary ireo rehetra nanampy sy nanohana anay tamin’iny zava-doza nataony mpitandro filaminana tao Bealanana iny.

Ireo raha fintinina ny fanazavana nataon’ilay mpampianatra voarohirohy tamin’iny raharaha iny.