Raha nanao be marenina ireo tompon’andraikitra nanaovana fitakiana fampitsaharana ity tetik’asa voalaza fa mampidi-doza ny zanaka Toliara ity dia tsy mbola kivy fa manohy hatrany ny tolona ‚ ny vondron’ny firaisamonim-pirenena izay miaro ny tontolo iainana ifotony sy ireo ny zon’olombelona ary indrindra ny hoavin’ny taranaka faramandimby ‚ fandrao mba hisy hiaino ihany na hahatsapa tena ka hitsinjo vahoaka Malagasy izay hizaka ny voka-dratsy ateraky ny fitrandrahana fasi-mainty ataon’ny orinasa Base Toliara ao amin’ny faritra Ranobe ary hapitsahatra izany.

Omaly 03 Febroary 2023 ‚ nanao fanambarana ireo vondrona voalaza etsy ambony ‚ mitaky ny handraisana fitondram-panjakana fepetra haingana amin’ny fampitsaharana io asa fitrandrahana io ‚ ho fitsinjovana ny vahoaka ifotony ‚ amin’ny fisian’ny radioactivité aterany izay hanimbana tanteraka ny tanàna sy fari-piainan’ireo mponina ifotony ka izany no atom-pijoroan’izy ireo.