Tamin’ny 09 Ora maraina teo no nigadona teto Antsohihy renivohitrin’ny Faritra Sofia ny Eveka vaovao hitantana ny Diosezin’Ambanja ‚ Mgr Donatien Francis Razanamalala sy ireo delegasionina niaraka taminy.

 Nitsena azy teo Anjiabe 07 Km tsy hidirana ny tanànan’i Antsohihy ireo tompon’andraikitra ara-panjakana izay notarihin’ny Lehiben’ny Prefektiora Antsohihy sy ny Sekretera jeneralin’ny Faritra Sofia ‚ tazana teny ny Solombavambahoaka voafidy teto Antsohihy Rémi dit Jao Jean sy ny Mpanakanto Vaney’s vadiny ‚ niaraka tamin’ny Solombavambahoaka voafidy tao Bealanana Volahaingo Marie Thérèse ary Ben’ny tanàna NASIRY Ali.

 Nanontrona ny fahatongavan’ity Eveka vaovaon’ny Diosezin’Ambanja ity ny Mpitandrina avy ao amin’ny fiangonana FJKM ‚ ny “Archevêque d’Antsiranana” Mgr Benjamin Marc Ramaroson sady Administrateur Apostolique d’Ambanja ‚ tao ihany koa ny Mgr Rosario Vella ‚ Evekan’ny Diosezin’Ambanja taloha izay miasa any amin’ny Diosezin’i Moramanga ankehitriny.