Vonton’alahelo amin’ny fahalasanan’ny mpiarabelona ao an-tanàna ny mponina ka samy naneho ny firaisankina amin’ny fiandrasam-paty tao Belalogno Distrika Befandrina Avaratra.

   Nandritra izany anefa no nanararaotra namaky trano ity rangahy tombanana ho 30 taona mahery ity ka tratra ary niharany hatezeram-bahoaka.

   Niezaka niaro ny ain-drangahy ihany ny mpitandro filaminana tao an-tanàna fa tsy tàna ny vahoaka efa romotra noho ny tsy fandriampahalemana ka tsy navelan’ny fokonolona raha tsy afak’aina.

   Tsiahivina fa herinandro vitsy izay no nisy rangahy mpandraharaha iray nikasa hanangom-bokatra‚ nisy nanafika sy nanetitetika tao an-tranony fa mbola avotra noho ny ezaka ny manampahefana ifotony‚ fa mbola karohina ireo mpivahiny nanao ny fanafihana hatramin’izao.