Ny alin’ny Sabotsy 24 Aogositra 2024 no tonga nanafika ny trano misy ireo mpitondra fivavahana 02 amin’ny fiangonana FLM Andranomadio Mampikony ireo dahalo miisa 05. Maty voatetitetika tamin’izany ny Pasitera François VIVIER sy katekista iray.

   Ny mpimasy mpitazona ody maherin’ireo dahalo no voalaza ho namporisika ireo tsy mataho-tody hamono ireto mpitondra fivavahana roa ireto‚ mba ahafahany mampanjaka ny ody maheriny‚ sy mampiroborobo ny halatra ataon’ireo olon-dratsy an-tanàna‚ araka ny resaka miely.

   Ny alahady 25 Aogositra 2024 ihany dia tratran’ny fokonolona ny 02 tamin’ireo namono mpitondra fivavahana roa ireto ka maty notetitetehana ihany koa‚ maso solon’ny maso. Mbola karohina ny 03 lahy.

   Nandriaka araka izany ny rà nateraky ny tsy fandriampahalemana ao amin’ny Distrikan’i Mampikony ny faraparany herinandro teo. Marihina fa Pasitera misotro ronono François VIVIER dia Ray niteraka an’i Franco Razafimbolahavana‚ tompon’andraikitra misahana onjam-peo tsy miankina iray ao Antsohihy sady mpilalao tantarao fanta-daza amin’iny faritra Sofia iny.