Tao Ambarijeby Est‚ kaominina Analalava no nanohizan’ny Talem-paritry ny Tontolo iainana sy fandrosoana lovain-jafy ny fitsidihana sy fanomezana toromarika ireo tantsaha mivelona sy mitrandraka vokatra avy amin’ny atiala fa indrindra ala honko izay nafindra fitantanana ny faraparany herinandro teo.

   Niaraka taminy‚ tamin’ity fotoana ity ny lehiben’ny Fampanoavana ao amin’ny fitsarana ambaratonga voalohany Analalava sy tompon’andraikitra avy ao amin’ny fitaleavam-paritry ny jono sy toekarena manga. Nisy ny fanentanana sy fampianarana ireo lalàna mifehy ny atiala sy ny harena voajanahary‚ harena an-dranomasina ary ny zo ananan’ireo vondron’olona ifotony amin’ny fiarovana azy.

   Tanjona mba ny hitohizan’ny fisitrahan’ireo « VOI » ny vokatra tsara avy amin’ny fiarovana ny atiala. Tanteraka izany noho ny fiaraha-miasa matotra tamin’ny Tetik’asa MISOTRY‚ ONG Planète Urgence. Faly ny vahoaka ary mahatsapa misy mpiahy ka nisaotra ny Talem-paritry ny Tontolo iainana sy fandrosoana lovain-jafy Sofia ary nanamafy ny fahavononana hiaro ny Tontolo manodidina azy fa indrindra ireo faritra nomena azy ho tantaniny.