Nandeha sambo kely ireto teratany Somalianina miisa 14 sy Malagasy 10 ireto‚ nikasa hiondrana an-tsokosoko hamaky sisin-dranomasin’i Madagasikara amin’iny tapany avaratra iny ka saron’ny mpitandro filaminana tao Ambalabao fokontany Marovato‚ kaominina Ankaramy Distrika Analalava ny 23 Jolay 2024 teo.

   Vola be 200 dolara isan’olona hoan’ny Somalianina‚ 03 tapitrisa Ariary hoan’ny teratany Malagasy no sarany fitaterana azy ireo hivoaka an-tsokosoko io. Nampanantenaina fa misy sambo lehibe haka azy ireo any ampovoan-dranomasina‚ hitondra azy hivoaka any ivelany.

   Ny fiandohan’ny volana Aogositra 2024 teo no niakatra fampanoavana ny raharaha ka nahiditra am-ponja vonjimaika ao fonjebe Antsohihy avokoa izy 24 miaraka amin’ny mpanamory.

   Zon’olombelona rehetra ny mivezivezy‚ fandikan-dalàna kosa ny fivoahana an-tsokosoko ny sisin-dranomasina ary ahavoazan-tsazy koa manentana ny olom-pirenena rehetra mba hanara-dalàna ny komandy ny vondro-tobi-pileovana Sofia‚ Kolonely Lys Odon Randriamidona.