Ny zoma 26 Jolay 2024 teo no nanaovana ny fitsarana manetriketrika nametrahana an’Andriamatoa HARIMILAMINA Ainarisoa Alinariantsoa ho filohan’ny fitsarana ambaratonga voalohany Antsohihy.

   Ny ady amin’ny kolikoly sy ny mpijirika ary ireo herisetra mianjady amin’ny zaza tsy ampy taona no laharam-pahamehana napetrany‚ ho tohizana ny ezaka tsara vita teo aloha amin’ny fanaovana fitsarana mitety vohitra ahafahan’ny vahoaka misitraka ny ZO-ny ary hisy ny famelabelaran-kevitra hatao hampahafantarana misimisy kokoa ny momba ny fitsarana. Tanjona ny fitsarana manakaiky vahoaka.

   Nanontrona ny fotoana teto ny fianakaviamben’ny Mpitsara eto Madagasikara‚ ny solombavambahoakan’i Madagasikara (03) voafidy amin’ny Distrika Antsohihy – Bealanana – Mandritsara‚ ny Préfet‚ ny Sekretera Jeneralin’ny Faritra Sofia, ireo Talem-paritra maro ary ny Ben’ny tanàna.

   Nitondra teny fisaorana hoan’ny filohan’ny fitsarana teo aloha Mamy Razafindrakoto‚ ireo tompon’andraikitra sy manampahefana eto Antsohihy. Ity farany moa voatendry hiasa any amin’ny fitsarana ambaratonga voalohany Farafangana.