Raha atambatra dia miisa 06 ireo dahalo mpampihorohoro vahoaka sy mparin-keloka maty voatifitry Zandary manao hetsika fampandrian-tany ataon’ny Zandarimaria ao amin’ny vondron-tobim-paritra Antsohihy‚ tarihin’ny Kapiteny Hery nialoha sy nandritra ary taoriany fetim-pirenena Malagasy 26 Jona 2024.

   Anisan’ireo efa lavo tamin‘izany i Diô – Léonard – Legoalahy dahalo mpampihorohoro vahoaka amin’iny Distrika Analalava iny ; Lavo koa i Jaira sy Tilahy efa nikoizana amin’ny fanafihana amin’iny kaominina Anahidrano sy Anjiamangirina ary Ankerika iny.

   Ny aliny 12 Jolay 2024 teo‚ raikitra ny fifanjevoana tamin’ny Dahalo tarihin’i Freddy sy ireo ekipany tamin’ny Fokonolona miaraka amin’ny Zandary amin’iny fokontany Ambiky kaominina Ankerika Distrika Antsohihy iny. Nampiasa fitaovam-piadiana ireo dahalo ka nampiasa ny azy koa ny Zandary miaraka amin’ny fokonolona ka maty voatifitra i Freddy fa tafaporitsaka kosa ireo namany ary mbola karohina.

   Mitohy hetsika fampandrian-tany ato amin’ny Distrikan’i Antsohihy ary tsy maintsy karohina sy atao hazalambo ireo olon-dratsy mpampihorohoro vahoaka‚ hoy ny fanazavana voaray avy amin’ny Zandarimaria.