Tratra ihany rehefa natao hazalambo nandritra 06 taona ingahy JARIVO na RAJAONARIVO Edmond dahalo mpamerin-keloka‚ tompon’antoka namono nahafaty Adjudant NOARA nandritra ny fifandonana tamin’ny fanafihana mahery vaika nitranga tao Andrangeza‚ kaominina ambanivohitra Ambohisoa, distrika Mandritsara, Faritra Sofia ny taona 2018 iny.

   Voasambotry Zandary mpanao fisafoana eo anivon’ny Vondron-tobim-paritra Andilamena ny maraina ny 09 jolay 2024 i JARIVO raha niverina tao Befanihy andrefana‚ fkt Ampondravelona, kaominina ambanivohitra Maroadabo, distrika Andilamena taorian’ny asa ratsiny. Nandritra ny famotorana dia niantso tsy tapaka ny Kapiteny TOBIASY Komandy ny vondron-tobim-paritra Andilamena ny fianakaviany fa hanome lelavola 20 tapitrisa Ariary mba hamotsorana azy. Nanonona olona ambony sy namoaka sarin’olona mpiaro azy i Jarivo‚ nambarany fa io Olona io mihitsy no hiantoka ny fandoavam-bola‚ ka ingahy Augustin RAKOTONDRAMANGA‚ izay fantatra amin’ny anarana FAGEDA, « Patron » mpividy vatosoa no nambarany tamin’izany‚ mipetraka any Antsomangana kaominina ambanivohitra Bemaintso, distrika Andilamena izy io raha ny fanazavana.

   Tanjona ny hamongorana hatrany ifotony ny mpanao ratsy fa indrindra ireo Dahalo ambony latabatra ka natao zary nekena ny handraisana io vola 20 tapitrisa Ariary io mba hamantarana sy hisamborana io FAGEDA voalaza io. Tetika matipaikan’ireo fianakaviana ihany anefa ireo voalaza ireo mba hanavotana an’i JARIVO izay nentina nitari-dàlana haka ilay volabe any amin’Atoa FAGEDA. Ny 11 jolay tokony ho tamin’ny 2ora maraina no nifanehatra tamin’ny velam-pandrik’ireo dahalo, tokony ho 3,5 kilometatra tsy hatongavana Antsomangana, ny Zandary no raikitra ny fifampitifirana izay naharitra ora iray teo. Nanararaotra izany mba handositra i JARIVO ka maty voatifitra nandritra ny fifanjeviana tamin’ireo Dahalo. Tsy naharesy tosika ny Zandary ireto farany ka nanao tari-dositra niankandrefana nihazo ny Renivohitra ny Kaominina Bemaintso. Miisa 04 samy nampiasa fitaovampiadiana mahery vaika sy basim-borona izy reo‚ hoy ny fanazavana voaray.

   Mitohy ny savahao atao ireo Dahalo ary tsy maintsy karohina torak’izany ihany koa io FAGEDA voatonona io mba hamantarana izay tena marina momba azy. Mitohy fampandriana fahalemana ahafahany vahoaka miaina milamina ato amin’ny vondron-tobim-paritra Andilamena‚ hoy Kapiteny TOBIASY komandy ny vondron-tobim-paritra Andilamena.