Nitondra teny fiarabana ireo solombavambahoaka ato amin’ny faritra Sofia izay lany tamin’ny vokatra ofisialy navoakan’ny HCC ny 27 Jona 2024 teo ny Lehiben’ny Prefektiora Antsohihy – Ralaivao Andriamaromaneho androany ary nisaotra ny vahoaka nanaraka ny lamina nandritra ny fifidianana.

   Didy tsy azo ivalozana iny nivoaka iny‚ na ireo nandresy na ireo resy dia tsy maintsy manaiky iny‚ raha misy ny tsy fahafaham-po na tsy fankasitrahana ny didy dia tsy tokony ato amin’ny faritra Sofia na eto Antsohihy no anehoana izany fa misy ny rafitra mahefa afaka mandray izany any amin’ny HCC izay namoaka ny didy ! Amin’ny maha tompon’andraikitra ny filaminana aty ifotony anay dia henonay fa mikasa hanao hetsika ireo tsy afa-po tamin’iny didy iny‚ koa mampandre sy mampahafantatra izahay fa handray andraikitra mifanaraka amin’izany. Mety misy ny olona manaraka anareo fa misy kosa ny olona manana ny safidy hafa ary mitady izany filaminana sy fandriampahalemana izany‚ aoka hifanaja amin’ny toerana misy azy ! hoy ny Lehiben’ny Prefektiora Antsohihy nanao fanambarana niaraka tamin’ny OMC io maraina io.

   Namafisiny Préfet fa ho raisina ho mpiray tsikombakomba izay toeram-pilanonana mampiantrano ny fihaonana hikarakarana ny hetsika tsy ara-dalàna sy tsy nahazahoana alalana‚ toraka izany koa ny haino aman-jery izay mivoy ny fanakorontanana miaraka amin’izy ireo. « Tsy namoaka didy izahay tompoko fa ny fitsarana avo momba ny lalam-panorenana no nanao izany koa raisinay ny andraikitra tandrify anay amin’ny fitandroana ny filaminana ary miantso ny vahoaka tsy hanaiky rebirebena amin’ny fanakorontanana » hoy hatrany ny Lehiben’ny Prefektiora.