Voaheloka 15 taona an-trano maizina sazy mihatra noho ny vonon’olona ny taona 2019 ity rangahy manao ankajo mavomavo izay voasambotra tamin’ny raharaha fakana an-keriny (kidnapping) tao Iavoloha ny volana septambra 2024 teo‚ raha ny angom-baovao.

   Voasambotra noho ny ezaka nataon’ny mpitandro filaminana izy ny herinandro teo. Manontany tena ny mpanara-baovao sy ny olom-pirenena manoloana ny tranga misy ankehitriny : Inona no zava-misy ao amin’ny fonjan’ny Tsiafahy ? Ahoana no nahafahan’olona efa voaheloka 15 taona mivezivezy manao habibiana aty ivelan’ny fonja nefa tsy mbola nisasaka ny saziny ?

   Andrasana ny fanazavana avy amin’ny manampahefana sy ny tompon’andraikitra ary manaitra ny Minisitry ny fitsarana mba hijery akaiky ny goragora sy gaboraraka ao anaty fonja fa ny vahoaka hatrany no mahita faisana amin’ny fisian’ireo tsy maty manota.