Faly ireo Ben’ny tanàna sy vahoaka any ifotony fa nisokafin’ny Governora Faritra Sofia ireo lalana mampifandray ireo kaominina saro-dalana. Ny fitaovana nomen’ny Filoham-pirenena (ENGINS) no ahafahana manatanteraka izany.

   Ankehitriny‚ miasa manohy ny fanamboaran-dalana mampifandray ny kaominina Tsiningia Distrika Boriziny araka ny fangatahana nataon’ny Solombavambahoaka amperinasa ny “Bulldozer” ; Nanamboatra ny lalana nandraisana ny JMJ tao Bealanana ary hitohy any Ambatoriha ny “chargeur” ; Manamboatra lalana ao amin’ny kaominina Kalandy ary tohizana any Tsaratanana Distrikan’i Mandritsara ny “Niveleuse”.

   Marihina fa tsy misy fitakiana ara-bola na fiantohana avy amin’ny fokonolona ny asa ataon’ny Faritra fa maimaim-poana avokoa fa tsy araka ny tsaho aelin’ireo sasany mitady toerana‚ araka ny fanazavana voaray. Fanaratsiana niniana aely tahaka ny mahazatra ny fanosoram-potaka rehefa akaiky ny fanendrena ny mpikambana eo anivon’ny Governemanta izao.

   Miezaka mafy ny tenako amin’izay eo am-pelan-tànana amin’ny fanamboaran-dàlana hanamorana ny famoaham-bokatra sy ny fifamezivezen’ny Vahoaka ato amin’ny faritra Sofia‚ hoy ny Governoran’ny faritra Sofia.