Ny 14 novambra lasa teo no nanatontosa fivoriambe tao Antananarivo ny antoko NY SAFIDIN’I MADAGASIKARA‚ voafidy tamin’izany ny filoha vaovao mitarika ny antoko Andriamatoa Nirina RAKOTOARIJAONA. Napetraka ho filohamboninahitra kosa ny filoha mpanorina ny antoko dia ny Jeneraly Désiré RAKOTOARIJAONA. Efa voapetraka sy voafidy tamin’io fivoriambe io ireo mpikambana mandrafitra ny birao maharitra.

   Antoko velona eto amin’ny firenena ny antoko NY SAFIDIN’I MADAGASIKARA. Nijoro tamin’ny taona 1995, ary mbola mijoro hatramin’izao. Amin’ny maha antoko miaina eto amin’ny firenena repoblikana azy dia hitondra ny anjarabirikiny amin’ny raharaham-pirenena rehetra fa indrindra izay hita fa mahatsara sy mahasoa ity tanindrazana iombonana ity ny antoko‚ raha ny fanazavana.

   Ao anatin’ny fiatrehana ny fifidianana ben’ny tanàna sy mpanolotsaina, izao dia tsy manana kandida natolotra amin’ny anarany ny antoko NY SAFIDIN’I MADAGASIKARA fa nisafidy ny hanohana kandida kosa‚ ka manao antso avo ho an’ireo rafitra mpikirakira fifidianana izy ireo mba hijoro hatrany amin’ny fanajana‚ ny tsy fitanilana sy ny ara-dalàna ho antoky ny fifidianana madio, tsy mitanila ary heken’ny rehetra. Manentana ny olom-pirenena ihany koa mba handray anjara mavitrika amin’ny latsa-bato amin’ny 11 desambra ho avy io.

   Tsy tokony hiraviravitanana isika vahoaka fa ny fifidianana ihany no ahafahana mitondra amin’ny fanovana eto amin’ny firenena. “Handeha harenina ny firenena ho fanohizana ny tolona”‚ hoy ny mpitarika antoko.