Hatramin’izao tsy mbola nisy azo ireo fanomezana na loka nampanantenaina an’i Anne Marie Longchamp Miss île de Madagascar 2024.

   Vola antsasan’ny saran-dalana no mba azony herintaona taoriany fifaninana‚ tsy mandray antso no tsy mamaly “message” ireo mpikarakara rehefa anontaniana momba ny saran-dalana sy ireo loka azony amin’ny maha mpandresy azy‚ nisalotra ny anaram-boninahitra Miss Madagascar 2024‚ raha ny fanazavana voaray.

   Nataon’ireo mpikarakara Miss et Mister Île de Madagascar ho fitadiavam-bola fotsiny ireo Tanora Malagasy mifaninana amin’io sehatra iray io. Mianton-tena izy ireo mamonjy fifaninana any Antananarivo‚ asaina mivarotra tapa-kila amin’ny sarany lafo izy ireo ka izay mahalafo betsaka no mana-tombo ankoatrany naoty omeny Mpitsara. Azo eritreretina fa izay manam-bola sy manana fianakaviana mahitahita afaka mividy tapakila maro no hivoaka mpandresy amin’ny fifaninana atao‚ hoy mpanakanto iray manana fifandraisana amin’i Anne Marie Longchamp naneho ny heviny sady namaky bantsilana ny fikafika sy fanararaotana ataon’ireo mpikarakara amin’ny fifaninana Miss & Mister Île de Madagascar.

   Nambaran’io mpanakanto io fa nitadiavana hirika‚ sy fomba hamotehana azy tsy hivoaka mpandresy i Anne Marie Longchamp fa tsy nahitana hevitra. Betsaka ihany koa ireo mpifanina mitaraina momba io Miss & Mister io fa tsy misy sahy mivoaka ampahibemaso. Hita taratra ary nibaribary nandritra ny fifaninana farany teo iny fa misy zavatra hafahafa sy tsy mazava ny momba io fifaninana io ka tokony handray fepetra mifanaraka amin’izany ny fitondram-panjakana‚ hoy hatrany ny fanehoan-kevitra nisesisesy tatoato.

   Tsy mbola nitondra fanazavana moa ny mpikarakara Miss & Mister île de Madagascar izay nahazo fanakianana mavaivay hatreto ka arahintsika eto ihany ny mety ho tohiny…