Nalaza tatoato fa mandrefy ny mpitandro filaminana ireo dahalo ary tena sahy tokoa mitifitra sy mandoro tranon’olona. Tsy miraviravy tànana manoloana izany ny Zandarimaria ao amin’ny vondron-tobim-paritra Antsohihy izay mifehy Distrika 03 ato amin’ny faritra Sofia (Antsohihy – Analalava – Bealanana)‚ fa mandray ny andraikitra tandrify sy miara-misalahy amin’ny fokonolona na fanomezam-baovao marina sy ara-potoana fotsiny dia efa zava-dehibe‚ hoy ny fanazavana.

   Nisehoan’ny halatr’omby tao amin’ny fokontany Marovato Sud‚ kaominina Ambarijeby Sud Distrika Analalava omaly tokony ho tamin’ny 02 maraina. Nisy ny fanarahandia natao ary hita nisy namatotra anaty kiritr’ala ireo omby lasa ireo ka natao andrimaso mba hisamborana ny olona nangalatra azy. Tokony tamin’ny 04 maraina androany 24 Septambra 2024 no tonga naka ny omby ilay olon-dratsy‚ «Aza mihetsika» hoy Zandary fa tsy nijanona ary nandositra namonjy ireo namany any Kizo i Jaomaneva dit Dinera ka voatery nampiasa fitaovana teny ampelatanany ireo Zandary nitifitra ka nahalavo azy.

   Toraka izany koa tao amin’ny kaominina Anjiamangirina Distrika Antsohihy. Voasambotra i Herinot izay nangalatra omby tao Antsakoamirantina‚ efa nihaiky ny heloka vitany sy nanaiky hanambara ireo namany saingy nandositra sy nampitandremana 03 km tsy hidirana Antsakoamirantina ka maty voatifitra. Dahalo mpamerin-keloka efa nigadra ny taona 2023 fa mbola nanohy ny asa ratsiny rehefa tafavoaka araka ny fanazavana voaray.

   Mitohy ny ezaka ary atao hazalambo ireo dahalo mpampihorohoro vahoaka mba hisiany fandriampahalemana maharitra araka ny fanazavana.