Raha ny zava-nisy dia tokantrano iray izay mandraharaha‚ misehatra amin’ny fivarotana enta-madinika ao amin’ny tanàna Tsiningia no nisy nanafika ny alin’ny 17 Jona hifoha 18 Jona 2024 teo. Entana sy fananana maro no lasa ary novonoin’ireo tsy mataho-tody ilay renim-pianakaviana tamin’io tokantrano io.

   Olona 04 voalaza ho nanao fanafihana namoizana ain’olona io. Nisy tamin’ireo fianakaviana niharany fanafihana sady nanatri-maso ny tranga no nahita ny 02 tamin’ireo nanao fanafihana mihaodihaody an-tanàna tamin’ity herinandro ity ka raikitra ny VALIFATY.

   Nosamborin’ny fokonolona izy roalahy voatondro ho nanao fanafihana‚ namono renim-pianakaviana mpandraharaha io ka nodarohina sy novonoina ihany koa ary nodorana ny alakamisy 04 Jolay 2024 teo.

   Olona avy amin’ny foko iray any atsimon’i Madagasikara iny ireto voalaza ho nanao fanafihana sy namon’olona ary niharany valifaty ireto. Tezitra noho izany ireo fianakaviany‚ sy mpiavy namany avy any ka mikasa hanao valifaty amin’ny mponina eo an-tanàna sady nanafatra olona an-jatony hanao ny VALIFATY ihany koa.

   Trano 01 no efa may ao TSININGIA izao‚ efa miantrana any an-toerana ny mpitandro filaminana mitambatra izay ahitana POLISY – MIARAMILA – ZANDARY‚ efa an-dalana koa ireo fanampiny hanamafy ny fitandroana ny filaminana. Mandray ny andraikiny ny manampahefana ifotony mba tsy hitaran’ny raharaha amin’ny zavatra hafa.