Nomena voninahitra farany tao amin’ny lapan’ny fitsarana ambaratonga voalohany Antsohihy ny vata-mangatsikan’itompokolahy Hery Rakotondravony – Mpitsara Solon-tonia mpampanoa lalàna ambony Mahajanga‚ izay maty nisy namono tamin’ny fomba mahatsiravina ary nalevina antsokosoko tao Antsahadinta Antananarivo.

   Ny mpamilin’ity Mpitsara ity sy ny sakaizany ihany no tompon’ny ketrika maloto‚ namono nahafaty azy ary nandevina ny nofo mangatsika antsokosoko tamin’ny tanin’ireo ray aman-dreniny rehefa nahazo alalana. Efa lasan’io vehivavy sakaizan’ny mpamily naniraka azy hamono mpitsara io ny vola tany amin’ny Banky sy fiara‚ araka ny fanazavana.

   Miisa 15 ny olona voasambotra sy voasaringotra amin’ity raharaha ity‚ raha ny vaovao nomen’ny Polisim-pirenena Malagasy.

   Raha tsy misy ny fiovana dia hatao rahampitso sabotsy 29 Jona 2024 ny fandevenana ny nofo mangatsikan’ity Mpitsara ity any Befotaka Avaratra. Nitondra teny fankaherezana hoan’ny fianakaviana ny fitondram-panjakana aty amin’ny faritra Sofia izay notarihin’ny Governora Faritra Sofia sy ny Lehiben’ny Prefektiora Antsohihy nandritra ny fandalovany tao amin’ny fitsarana ambaratonga voalohany. Nandray sy nanome voninahitra ny Razana tamin’ny alalany fanaovana « Piquet » ny Mpitsara namany ato amin’ny faritra Sofia sy avy amin’ny fitsarana ambony Mahajanga. Efa misy Mpitsara avy amin’ny Cours Suprême izay zanaky ny kaominina Befotaka Distrika Analalava koa tonga hiatrika ny fandevenana rahampitso sabotsy io.