Velon-taraina ity renim-pianakaviana ity fa tsy afaka nandray anjara amin’ny fanadinana Bakalorea 2024 ny zanany kanefa nanefa vola sivy alina ariary (90 000Ar) tamin’olona mitana andraikitra ao amin’ny lycée Victor Miadana Mandritsara izy.

   Voatonona ny anaran’i Zozo sy Marcelin fa nampanantena fa hikarakarana momba ny antotan-taratasy ahafahana mampiditra ireo ankizy ho kandida miatrika fanadinana amin’ity taona ity.

   Tonga ny fotoana hanaovana fanadinana androany 22 Jolay 2024‚ tsy nahazo taratasy fiantsoana (convocation) ireo mpianatra ary tsy hita anaty lisitry ny mpiadina ihany koa. Nohadihadiana sy nanontaniana ireo tompon’andraikitra mikirakira fanadinana isan’ambaratongany fa tsy misy antotan-taratasy tonga momba ireo ankizy ireo mihitsy any amin’ny tompon’andraikitra sy sampandrahara misahana ny fanadinana.

   Kivy ireo mpianatra ka saika hidaroka ilay olona naka vola sy nampanantena azy ireo fa notambatambazin’ny ray aman-dreniny amin’ny maha Kristianina fa na izany mitaky famerenam-bola ireo ray aman-dreny lasibatry ny fitaka sy fisolokiana‚ voalaza fa am-polony izy ireo raha ny resaka miely‚ 03 amin’izy ireo no tafaresaka tamin’ny mpanao gazety. Arahintsika eto ny mety ho tohiny‚ andrasana ihany koa ny fandrasaina andraikitry ny fitondram-panjakana manoloana izao toe-draharaha ao Mandritsara izao.