Hatairana no nandrenesan’ny Pasitera amin’ny fiangonana Kristianina iray ao Bealanana ny feon-jaza mitomany mafy eo ambaravarany androany talata 09 Jolay 2024 tokony ho tamin’ny 08 ora alina teo.

   Raha ny fanazavana dia nisy nametraka tao ambany fiarany amin’izao andro mangatsika‚ vanim-potoana ny ririna izao ity zazakely tsy nitafy lamba ity‚ miaraka amin’ny taratasy kely mirakitra ny hafatra nalefan’ny Reniny.

   Voalaza ao anaty taratasy fa tsy eken’ny Rainy izay voatondro ho mpanompo sampy hoetina mivavaka ilay zazakely ary kasainy ho vonoina ka nitady hevitra ny hanafenana sy hanavotana an-janany ilay renim-pianakaviana izay nanao antso avo amin’ny tokony hikarakarana ny zanany mandrapaha hisiany vahaolana.

   Nampandrenesina ny mpitandro filaminana sy manampahefana an-tanàna momba ity tranga ity. Misokatra ny fanadihadiana mba ahitana ny marina‚ efa nahazo lamba nirakofana ilay zaza ary efa eo ambany mason’ilay Pasitera ankehitriny.